(កំពង់ឆ្នាំង)៖ករណីដែលមន្រ្តីនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ឆ្នាំង បង្ក្រាបទីតាំងដាក់ម៉ាស៊ីនកិនកម្ទេចឈើខុសច្បាប់មួយកន្លែង ស្ថិតនៅក្នុងភូមិក្រាំងស្គារត្បូង ឃុំក្រាំងស្គារ ស្រុកទឹកផុស ដែលដឹកនាំរុករកនិងបង្ក្រាបដោយលោក កែវ វ៉ាន្នី ព្រះរាជអាជ្ញារងអមសាលាដំបូងខេត្តកំពង់ឆ្នាំង កាលពីថ្ងៃទី២៨ ខែមីនា ឆ្នាំ២០២៤កន្លងទៅ។ករណីនេះផងដែរមកដល់រសៀលថ្ងៃទី៣០ ខែមីនា ឆ្នាំ២០២៤នេះ តាមបញ្ជារបស់លោកព្រះរាជអាជ្ញា សមត្ថកិច្ចចម្រុះមាននគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្ត និងខណ្ឌរដ្ឋបាលព្រៃឈើកំពង់ឆ្នាំង បានររឹបអូសម៉ាស៊ីនកិនកម្ទេចឈើចំនួន២គ្រឿង និងគ្រឿងចក្រចំនួន២គ្រឿងជាវត្ថុតាងនៃបទល្មើសយកទៅរក្សាទុកនៅផ្នែករដ្ឋបាលព្រៃឈើរមាស ដើម្បីកសាងសំណុំ រឿងតាមនិតិវិធី។
លោក ពារ គឹមហេង នាយខណ្ឌរដ្ឋបាលព្រៃឈើកំពង់ឆ្នាំង នៅរសៀលថ្ងៃទី៣០ ខែមីនានេះ បានប្រាប់ឲ្យដឹងតាមទូរស័ព្ទថា: ដោយអនុវត្តតាមបទបញ្ជារបស់លោកព្រះរាជអាជ្ញាអមសាលា ដំបូងខេត្ត នៅរសៀលថ្ងៃទី៣០ ខែមីនានេះ សមត្ថកិច្ចបានរឹបអូសដោះយកម៉ាស៊ីនកិនកំទេចឈើចំនួន២គ្រឿង និងឌីណាម៉ូបំពាក់លើម៉ាស៊ីនកិនកម្ទេចឈើចំនួន២គ្រឿង ព្រមទាំងគ្រឿងចក្រចាប់លើកដើមឈើចំនួន២គ្រឿង(គ្រឿងចក្រសម្រាប់ចាប់លើកដើមឈើញាត់ចូលម៉ាស៊ីនកិន) នៅលើទីតាំងដីក្រុមហ៊ុន(ហ្គ្រីនរីសត)ស្ថិតនៅក្នុងភូមិក្រាំងស្គារត្បូង ឃុំក្រាំងស្គារ ស្រុកទឹកផុស ដែលបានធ្វើសកម្មភាពបទល្មើសកិនកំទេចឈើដោយគ្មានច្បាប់អនុញ្ញាត វត្ថុតាងធ្វើសកម្មភាពល្មើសទាំងអស់ខាងលើនេះបានយកទៅរក្សាទុក្ខនៅផ្នែករដ្ឋបាលព្រៃឈើរមាសក្នុងស្រុកទឹកផុស។
លោកនាយខណ្ឌរដ្ឋបាលព្រៃឈើកំពង់ឆ្នាំងបានបញ្ជាក់ឲ្យដឹងទៀតថា: នៅក្នុងអំឡុងខែកក្កដា ឆ្នាំ២០២៣ សកម្មភាពកិនកំទេចដើមឈើរបស់ក្រុមហ៊ុនខាងលើនេះត្រូវបានសមត្ថកិច្ចរបស់លោកធ្វើការផាកពិន័យ និងផ្អាកសកម្មភាពម្ដងរួចមកហើយ កាល ណោះម្ចាស់ក្រុមហ៊ុនបានអះអាងថា គេកិនកម្ទេចឈើយកទៅធ្វើជី ចំណែកឈើដែលដឹកយកមកកិននោះគឺកាប់នៅក្នុងដីចម្ការរបស់គេតែប៉ុណ្ណោះ ហើយមន្ត្រីរបស់លោកក៏បានណែនាំឲ្យម្ចាស់ក្រុមហ៊ុនសុំច្បាប់អនុញ្ញាតពីក្រសួងកសិកម្មឱ្យបានត្រឹមត្រូវសិន ព្រោះអាជីវកម្មទ្រង់ទ្រាយធំបែបនេះថ្នាក់ខេត្ត ពុំមានសិទ្ធិសម្រេចនោះឡើយ។ ប៉ុន្តែមកដល់ពេលនេះក្រុមហ៊ុននៅតែលួចលាក់ធ្វើសកម្មភាពដោយមិនមានច្បាប់អនុញ្ញាតដដែល ហើយនៅពេលសមត្ថកិច្ចចុះមកពិនិត្យទីតាំងធ្វើសកម្មភាពខាងលើនេះជាក់ស្ដែង គីទាំងកម្មករ និងម្ចាស់ក្រុមហ៊ុនបានរត់គេចខ្លួនបាត់អស់ដោយពុំបាននៅសហការជាមួយសមត្ថកិច្ចនិងអាជ្ញាធរនោះឡើយ។
ដោយឡែកប្រភពព័ត៌មានពីប្រជាពលរដ្ឋនៅក្នុងមូលដ្ឋានបានបញ្ជាក់ឲ្យក្រុមអ្នកយកព័ត៌មានយើងដឹងថា: តាំងពីក្រុមហ៊ុនមួយនេះដាក់ម៉ាស៊ីនកិនកំទេចឈើរួចមក គេពិនិត្យឃើញមានគោយន្តក្នុងស្រុកមួយថ្ងៃៗជាច្រើនគ្រឿងបានដឹកកូនឈើតូចធំស្រស់ៗយកមកឡើងលើជញ្ជីងថ្លឹងលក់ឱ្យក្រុមហ៊ុននេះ ដោយក្រុមហ៊ុនបានអះអាងថា យកមកកិនអោយហ្មត់រួចដឹកយកទៅធ្វើជី ដែលករណីនេះជារឿងគ្រោះថ្នាក់បំផុតចំពោះព្រៃឈើដែលជាធនធានធម្មជាតិនិងត្រូវវិនាសបាត់បង់ថ្ងៃណាមួយមិនខានឡើយ ប្រសិ នបើក្រុមហ៊ុននេះនៅបន្តធ្វើសកម្មភាពហើយមិនបានទប់ស្កាត់ទាន់ពេលវេលា។
សូមបញ្ជាក់ថាៈ កាលពីរសៀលថ្ងៃទី២៧ ខែមីនាឆ្នាំ២០២៤ សមត្ថកិច្ចនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ឆ្នាំង បានស្ទាក់ចាប់បានរថយន្តធំមួយគ្រឿងនៅលើផ្លូវ ជាតិលេខ៥ ចំណុចឃុំឈូកស ស្រុកកំពង់ត្រឡាច ដែលក្រុមហ៊ុនខាងលើនេះបានដឹកកំទេចឈឺហ្មត់កិនរួចមួយរថយន្តដែលមានចំនួន២៨តោន ចេញពីទីតាំងក្រុមហ៊ុនខាងលើនេះ ដែលមានគោលដៅដឹកយកទៅខេត្តកំពត ដោយមានការសង្ស័យទៅលើករ ណីកំទេចឈើដែលសមត្ថកិច្ចរកឃើញនៅលើរថយ ន្ត ទើបសមត្ថកិច្ចបានសុំការសម្របសម្រួលពីលោកព្រះរាជអាជ្ញាអមសាលាដំបូងខេត្ត ចុះស្រាវជ្រាវករណីខាងលើនេះភ្លាមៗដែរ ខណៈនោះដែរលោកព្រះ រាជអាជ្ញាក៏បានចាត់ឱ្យលោក កែវ វ៉ាន្នី ព្រះរាជអាជ្ញារងអមសាលាដំបូងខេត្ត ដឹកនាំសមត្ថកិច្ចចម្រុះចុះរុករករហូតឈានដល់ការបង្ក្រាប និងរឹបអូសវត្ថុតាងនៅថ្ងៃទី៣០ ខែមីនា ឆ្នាំ២០២៤នេះ តាមបញ្ជារបស់លោកព្រះ រាជអាជ្ញាអមសាលាដំបូងខេត្តតែម្តង។
ប្រជាពលរដ្ឋនៅក្នុងខេត្តកំពង់ឆ្នាំង សូមថ្លែងអំណរគុណនិងកោតសរសើរដោយស្មោះចំពោះស្នាដៃបង្ក្រាបសកម្មភាពបទល្មើសបំផ្លាញធនធានធម្មជាតិមានលក្ខណៈទ្រង់ទ្រាយធំ របស់សមត្ថកិច្ច និងស្ថា ប័នអយ្យការខេត្តកំពង់ឆ្នាំង ដែលដឹកនាំធ្វើការស្រាវជ្រាវ និងបង្ក្រាបផ្ទាល់ពីលោកព្រះរាជអាជ្ញាខាងលើនេះបានទាន់ពេលវេលា បើមិនដូច្នោះទេ ព្រៃឈើដែលមិនទាន់គ្រប់អាយុជាច្រើននិងត្រូវបានក្រុមហ៊ុនមួយនេះ បំផុសប្រជាពលរដ្ឋឲ្យកាប់យកមកលក់ឱ្យក្រុមហ៊ុនរបស់ខ្លួន ដើម្បីកិនកម្ទេចបំផ្លាញធ្វើឱ្យបាត់បង់ធនធានធម្មជាតិជាមិនខានឡើយ៕
