ខណ្ឌរដ្ឋបាលជលផលកំពង់ឆ្នាំងអំពាវនាវដល់ប្រជាពលរដ្ឋដែលមកទិញត្រីធ្វើប្រហុក,ផ្អក, ត្រីឆ្អើរ,ឬទឹក ត្រី សម្រាប់យកទៅទុកផ្គត់ផ្គង់គ្រួសារក្នុងរដូវត្រីចុះនេះ

(កំពង់ឆ្នាំង)៖ក្នុងរដូវនេសាទឆ្នាំ២០២៤-២០២៥ គឺត្រីចាប់ផ្ដើមបម្លាស់ទីចេញពីបឹងទន្លេសាប បឹងបួរស្ទឹង និងព្រែកនានា ចូល ទន្លេសាប ទន្លេមេគង្គ ទន្លេបាសាក់ ដែលជាការអំណោយផលដល់ការធ្វើនេសាទបានត្រីច្រើន។ហេតុនេះខណ្ឌរដ្ឋបាលជលផលកំពង់ឆ្នាំង បានជូនដំណឹងដល់ប្រជាពលរដ្ឋក្នុងខេត្តកំពង់ឆ្នាំង ដែលមានបំណងចង់មកទិញត្រីយកទៅធ្វើប្រហុក,ផ្អក,ត្រីឆ្អើរ, ទឹកត្រី,ដើម្បីទុកផ្គត់ផ្គង់ក្នុងគ្រួ សារនិងតុសម្រាប់ការទទួលទានមានរយៈពេលយូរ សូមអញ្ជើញរួសរាន់មកទិញត្រីនៅជួរមាត់ទន្លេ និងនៅតាមបណ្ដាភូមិសាស្ត្រផ្សេងៗក្នុងខេត្ត ឬក៏នៅជើងកំពង់ឆ្នុកទ្រូ ក្នុងស្រុកបរិបូរណ៍ ជាដើម។

ក្នុងនោះដែរ ខណ្ឌរដ្ឋបាលជលផលសំណូមពរដល់អាជ្ញាធរមូលដ្ឋានឬសមត្ថកិច្ចពាក់ព័ន្ធ មេត្តាជួយសម្រួលជូនដល់បងប្អូនប្រជាពលរដ្ឋបានធ្វើដំណើរស្នាក់នៅនិងដឹកជញ្ជូនផលិតផលត្រីឱ្យបានសមស្របទៅតាមជាក់ស្ដែង។

ប្រជាពលរដ្ឋនៅក្នុងភូមិឆ្នុកទ្រូ ដែលមានមុខរបរនេសាទត្រី និងជាអ្នកទិញត្រីលក់ បានប្រាប់ឲ្យដឹងថា: ត្រីឆ្នាំនេះចាប់ផ្ដើមចុះយ៉ាងគំហុកចាប់ពីខ្នើតទី១ ដែលខុសពីឆ្នាំមុនៗ។កាលពីឆ្នាំមុនៗក្នុងខ្នើតទី១ ត្រីមិនសូវចុះច្រើននោះទេ រហូតដល់ខ្នើតទី២ និងខ្នើតទី ៣ ទើបត្រីសម្រុកចុះខ្លាំង។ដោយឡែកក្នុងឆ្នាំនេះត្រីគ្រប់ប្រភេទចាប់ផ្ដើមត្រូវតាំងពីថ្ងៃ៦កើត នៃខ្នើតទី១ ទៅហើយ។រីឯតម្លៃត្រីដែលត្រូវខ្លាំងក្នុងថ្ងៃទី១និងទី ២ក្នុងខ្នើតទី១ ត្រូវនឹងថ្ងៃទី៧ ខែធ្នូ ឆ្នាំ២០២៤នេះដែរ ត្រីគ្រប់ប្រភេទមានតម្លៃដូចខាងក្រោម។

ប្រភេទត្រីឆ្កោក ត្រីមួយក្បាលមានទម្ងន់ចាប់ពី ១គីឡូកន្លះឡើងទៅ ក្នុងមួយគីឡូ តម្លៃ១៥,០០០រៀល,(មុនត្រីត្រូវតម្លៃ២៥,០០០ រៀលក្នុងមួយគីឡូ),ត្រីឆ្កោ កមួយក្បាលទម្ងន់១គីឡូ តម្លៃ១០,០០០រៀល,ត្រីឆ្កោ កទម្ងន់ ០.៨គីឡូ មួយក្បាលតម្លៃ៨,០០០រៀល,ត្រីឆ្កោកទម្ងន់០.៥គីឡូ តម្លៃ៦,០០០រៀល។ត្រីច្រកែងទំហំ៣ក្បាល១គីឡូ តម្លៃក្នុង១គីឡូ ៥,០០០រៀល, ត្រីរៀលប្រភេទត្រីឆ្អើរ តម្លៃមួយគីឡូ២,០០០រៀល,ត្រីចម្រុះប្រភេទ(ឆាកា) មួយគីឡូតម្លៃ១,០០០រៀល, ប្រភេទត្រីប្រហុកត្រីរៀល តម្លៃក្នុងមួយគីឡូ១,២០០រៀល,ប្រភេទត្រីនុយមួយគីឡូ តម្លៃ៥០០រៀល,(ត្រីប្រភេទនេះមុនត្រីត្រូវតម្លៃពី១,៥០០ទៅ២,០០០រៀលក្នុងមួយគីឡូ)។បើតាមការបញ្ជាក់របស់ប្រជានេសាទនិងពលរដ្ឋអ្នកទិញត្រីបានបញ្ជាក់ថា តម្លៃនេះនិងនៅមានចុះជាបន្តបន្ទាប់នៅក្នុងរដូវត្រីចុះទាំង៣ខ្នើតនេះផងដែរ។

ដោយឡែកនៅក្នុងរដូវត្រីចុះឆ្នាំនេះផងដែរ បើតាមការបញ្ជាក់ពីប្រជានេសាទនៅស្រុកជលគីរី ដែលជា ផ្នែកខាងក្រោមនៃផ្ទៃទឹកបឹងទន្លេសាប បានអោយដឹងដែរថា ពួកគាត់បានដាក់មងក្រឡា ពី២ហ៊ុន ទៅ ២ហ៊ុនកន្លះ គឺដាក់យកត្រីប្រភេទត្រី(កន្តប្លុក)ឬត្រី (បន្ទោះភ្លុក)រីឯតម្លៃត្រីប្រភេទនេះនៅថ្ងៃទី៧ ខែធ្នូនេះដែរ តម្លៃក្នុងមួយគីឡូ៤,០០០រៀល។ពួកគាត់បានបញ្ជាក់ឲ្យដឹងទៀតថា នៅតំបន់គាត់ក្នុងស្រុកជល គីរីនេះ ត្រីប្រភេទនេះត្រូវតែមួយខ្នើតក្រោយនេះទៀតទេ ចប់ខ្នើតនេះគាត់នឹងនាំគ្នាទៅរាយមងនៅឯតំបន់ឆ្នុកទ្រូនោះវិញដែរ។ព្រោះនៅខាងឆ្នុកទ្រូត្រីនិងត្រូវ២ខ្នើតទៀតទើបផុតរដូវត្រីចុះ៕