មនុស្ស៤នាក់រងរបួសធ្ងន់ និងស្រាលក្នុងហេតុការណ៍ផ្ទុះគ្រាប់ចាស់១គ្រាប់សល់ពីសង្គ្រាម នៅក្នុងឃុំឆ្នុកទ្រូស្រុកបរិបូណ៌

(កំពង់ឆ្នាំង)៖មនុស្ស៤នាក់បានរងរបួសធ្ងន់និងស្រាលនៅក្នុងហេតុការណ៍ផ្ទុះគ្រាប់ដែលបន្សល់ទុកពីសម័យសង្គ្រាមមួយគ្រាប់ មិនស្គាល់ប្រភេទគ្រាប់ ដែលជនរងគ្រោះរើសបានពីក្នុងទឹកទន្លេ និងបានយកមកគប់លេងបណ្តាលគ្រាប់នោះផ្ទុះឡើង ទើបបណ្ដាលឱ្យមានមនុស្សក្មេងចាស់រងរបួសធ្ងន់និងស្រាលចំនួន៤នាក់។

ហេតុការណ៍ខាងលើនេះ បានកើតឡើងកាលពីវេលាម៉ោងនៅ៤៖០០នាទីរសៀល ថ្ងៃទី១១ ខែឧសភា ឆ្នាំ២០២៤ នៅចំណុចកោះមនោ ក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង។

បើយោងតាមរបាយការណ៍របស់សមត្ថកិច្ចបានអោយដឹងនៅថ្ងៃទី១២ ខែឧសភា ឆ្នាំ២០២៤នេះថា: ករណីខាងលើនេះ នៅមុនពេលកើតហេតុមានបុរសម្នាក់រស់នៅក្នុងភូមិឃុំខាងលើ បានយកមងទៅរាយនៅក្នុងទន្លេ ហើយក៏បានប្រទះឃើញគ្រាប់មិនទាន់ផ្ទុះមួយគ្រាប់មិនស្គាល់ប្រភេទជាគ្រាប់អ្វីនោះទេ និងបានស្រង់យកគ្រាប់នោះមកគប់លេងនៅលើដីមាត់ ច្រាំងទន្លេ លុះគប់ចុះឡើងជាច្រើនសារ ទើបគ្រាប់នោះក៏បានផ្ទុះឡើង បណ្ដាលឲ្យមានមនុស្ស២នាក់រងរបួសស្រាលក្នុងនោះមានកុមារអាយុទើបតែ១ខូបម្នាក់ផងដែរ។និងមនុស្សចាស់២នាក់ទៀតរងរបួសធ្ងន់ តែមិនបណ្តាលឲ្យមានគ្រោះថ្នាក់ដល់អាយុជីវិតនោះឡើយ។ភ្លាមៗនោះដែរជនរងគ្រោះទាំង៤នាក់ត្រូវបានបញ្ជូនមកព្យាបាលនៅមន្ទីរពេទ្យបង្អែកស្រុកបរិបូរណ៍។

លោក ចេង ចាន់ដូណា អភិបាលស្រុកបរិបូរណ៍ បានអោយអ្នកសារព័ត៌មានដឹងនៅថ្ងៃទី១២ ខែឧសភា ឆ្នាំ២០២៤នេះថា: ជនរងគ្រោះទាំង៤នាក់ខាងលើនេះមាន ១-ឈ្មោះ សេន សារី ភេទប្រុសអាយុ២៣ឆ្នាំ រងរបួសធ្ងន់ ,ទី២-ឈ្មោះ សេន ពូកៅ ភេទប្រុសអាយុ ៤៣ឆ្នាំ រងរបួសធ្ងន់ ,ទី៣-ឈ្មោះ សេន ម៉ាលិច ភេទ
ប្រុសអាយុ១០ឆ្នាំ រងរបួសស្រាលនិងក្មេងម្នាក់ទៀត ទើបតែមានអាយុជាង១ខួប រងរបួសស្រាលជនរងគ្រោះទាំងអស់ជាជនជាតិខ្មែរឥស្លាម រស់នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។

លោកអភិបាលស្រុកបានអោយដឹងទៀតថា: បន្ទាប់ពីកើតមាននូវករណីគ្រោះថ្នាក់ខាងលើនេះ ដោយ មានការយកចិត្តទុក្ខដាក់ពីលោកអភិបាលខេត្តកំពង់ឆ្នាំង លោកក៏បានអោយរថយន្តសង្គ្រោះរបស់មន្ទីពេទ្យបង្អែកស្រុកបរិបូរណ៍ប្រញ៉ាប់ចេញទៅដឹកជញ្ជូនជនរងគ្រោះយកមកសង្គ្រោះបន្ទាន់ភ្លាមៗនៅមន្ទីរពេទ្យ និងបានចាត់កម្លាំងសមត្ថកិច្ចជំនាញស ហការជាមួយអង្គភាពកំចាត់មីនស៊ីម៉ាក់ (CMAC) ចុះទៅដល់ទីតាំងដើម្បីពិនិត្យកន្លែងកើតហេតុជាក់ស្តែង ក្រែងមានសេសសល់គ្រាប់មិនទាន់ផ្ទុះនៅទីនោះទៀត។

លោកអភិបាលបានបញ្ជាក់ទៀតថា ក្នុងចំណោមជនរងគ្រោះទាំង៤នាក់ខាងលើនេះមាន២នាក់រងរបួសធ្ងន់ត្រូវបានបញ្ជូនមកសង្គ្រោះបន្ទាន់នៅមន្ទីពេទ្យបង្អែកខេត្តផងដែរ។ដោយឃើញហេតុការណ៍គ្រោះថ្នាក់បែបនេះលោកក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ត្រូវណែនាំដល់កូនចៅតូចៗរបស់បងប្អូន នៅពេលប្រទះឃើញគ្រាប់ចាស់ៗមិនទាន់ផ្ទុះឬក៏មានការសង្ស័យថា ជាប្រភេទគ្រាប់មិនទាន់ផ្ទុះសូមកុំធ្វើការប៉:ពាល់ឲ្យសោះគឺត្រូវប្រញាប់រាយការណ៍ជូនសមត្ថកិច្ចដែលនៅជិតបងប្អូន ដើម្បីចៀសវាងគ្រោះថ្នាក់ដោយប្រការណាមួយដែលបានកើតឡើងជាយថាហេតុ បណ្ដាលមកពីគ្រាប់មិនទាន់ផ្ទុះដូចករណីខាងលើនេះ៕